Tveggja ára skilorð fyrir líkamsárás

Karlmaður var í Héraðsdómi Austurlands dæmdur í tveggja ára skilorðsbundið fangelsi fyrir líkamsárás sem átti sér stað fyrir utan gistihúsið að Skipalæk í Fellabæ. Maðurinn réðst ásamt félaga sínum að öðrum manni og sló hann margoft með krepptum hnefa í höfuð og andlit bæði þar sem hann sat inni í bifreið og þar sem hann lá á bílaplani við gistihúsið.

Vitorðsmaður hins dæmda hrinti manninum tvisvar sinnum harkalega. Í annað skiptið með þeim afleiðingum að hann lenti utan í vegg gistihússins. Auk þess sló hann manninn hnefahögg í andlitið. Maðurinn játaði sök í málinu en félagi hans neitaði og hefur ekki verið dæmt í máli hans.