Framsókn hefði mátt standa oftar í lappirnar í erfiðum málum

„Ég hef fundið til með vini mínum Vilhjálmi Vilhjálmssyni undanfarna daga," sagði Björn Ingi Hrafnsson, borgarfulltrúi Framsóknarflokksins á fundi með flokkssystkinum sínum í höfuðstöðvum Framsóknarflokksins við Hverfisgötu. „Hann á ekki skilið þá meðferð sem hann hlaut þegar baklandið í flokk hans brást honumn algerlega."

Á fjölsóttum opnum fundi sem Framsóknarflokkurinn efndi til nú í hádeginu útskýrði Björn Ingi fyrir flokkssystkinum sínum aðdragandann að myndun nýs meirihluta. „Maður sprengir ekki meirihlutasamstarfið í borginni að gamani sínu," segir Björn Ingi. „Maður fær ekki heilann stjórnmálaflokk upp á móti sér upp á grín."

Þá sagði Björn Ingi að stundum kastaðist í kekki og menn næðu að leysa það en svo væri ekki alltaf. „Mér hefur fundist á undanförnum árum að Framsóknarflokkurinn hafi stundum oftar mátt standa í lappirnar í erfiðum málum, segja hingað og ekki lengra, ég get þetta ekki," sagði Björn Ingi og spurði fundarmenn hvort þeir hefðu verið ánægðir hefði hann gengið að kostum sjálfstæðismanna. Uppskar hann nei úr hópi fundarmanna. „Það var ekkert annað að gera í stöðunni," sagði Björn Ingi um samstarfsslitin.

Alfreð Þorsteinsson bætir því við að það var bara ekkert annað að gera í stöðunni þar sem Sjálfstæðisflokkurinn var orðinn ósamstarfshæfur vegna innbyrðis átaka.

Í fyrirspurnum á eftir var Björn Ingi spurður um eigendafundinn hjá REI og OR sem nú er fyrir dómstólum. Björn Ingi segir að eðlilegast sé að halda þennan fund aftur og ganga frá málum í stað þess að bíða í fleiri mánuði eftir niðurstöðu úr málssókninni.

Fundarstjóri var Alfreð Þorsteinsson og auk Björns Inga ávarpaði Óskar Bergsson fundarmenn. Óskar segir að Alfreð hafi reynt að gera lítið úr hlut sínum í þessu máli. „Staðreyndin er sú að eftir að Guðlaugur Þór rak Alfreð úr starfi hafði hann nægan tíma til að fella meirihlutann í borginni," segir Óskar.

Fullt var út að dyrum á fundinum og er Björn Ingi hafði lokið máli sínu stóðu fundargestir upp og klöppuðu honum lof í lófa.