Laun seðlabankastjóra hafa hækkað um 25 prósent síðan 2005

Hörð samkeppni um hæft starfsfólk á meðal fjármálastofnana réð því að bankaráð Seðlabankans ákvað að hækka laun bankastjóra. Þetta kemur fram í skriflegu svari Helga S. Guðmundssonar, formanns bankaráðs Seðlabankans, við fyrirspurn fréttastofu Stöðvar 2. Frá ársbyrjun 2005 hafa laun bankastjóra Seðlabankans hækkað um 25 prósent.

Í fyrirspurn fréttastofu Stöðvar 2 var óskað eftir upplýsingum um launahækkanir seðlabankastjóra undanfarin þrjú ár og afhverju ákveðið var að hækka launin nú. Þá var ennfremur óskað eftir upplýsingum um önnur fríðindi bankastjóra.

Í svari sínu vísar Helgi S. Guðmundsson, formaður bankaráðs Seðlabankans, í ræðu sem hann hélt á ársfundi bankans 30. mars síðastliðinn. Þar sagði hann að hörð samkeppni ríkti á milli fjármálastofnana um hæft starfsfólk. Afar mikilvægt værir fyrir Seðlabankann að hafa jafnan í þjónustu sinni eins gott starfslið og völ er á og því verði hann að taka mið að ríkjandi umhverfi til þess að svo verði.

Frá árinu 2005 hafa laun bankastjóra hækkað um 25 prósent. Í ársbyrjun 2005 hækkuðu launin um 15 prósent, 5 prósent í ársbyrjun 2006 og aftur um 5 prósent í ársbyrjun 2007. Frá 1. janúar á næsta ári munu laun bankastjóra nema alls 1.409.535 krónum.

Ennfremur segir í svari Helga að bankastjórar hafi til umráða bifreið sem bankinn leggi þeim til og greiðir kostnað af. Þá greiðir bankinn einnig símakostnað bankastjóranna.

Þá kemur fram í svari Helga að formaður bankastjórnar fær 8 prósent álag á laun bankastjóra. Þá fá bankastjórar einnig greidda bankaráðsþóknun eins og hún er ákveðin hverju sinni af forsætisráðherra. Nú nemur hún 110 þúsund krónu og fær formaður bankastjórnar tvöfalda þóknun.