Oddatá kaupir eignir Kambs og hyggst starfa á Flatey

Oddatá, sem er að mestum hluta í eigu og undir stjórn Kristjáns Erlingssonar, hefur keypt kaupir allar fasteignir og tæki Kambs á Flateyri með það fyrir augum að halda áfram vinnslu í byggðarlaginu. Eins og kunugt er ákváð eigandi Kambs fyrir skemmstu að selja eignir sínar og misstu 120 manns vinnu við það.

Í tilkynningu frá Oddatá kemur fram að markmiðið með kaupunum sé fyrst og fremst að viðhalda og efla blómlega byggð á Flateyri og hafa eigendur Kambs með aðkomu sinni að samningnum lagt sitt af mörkum til að gera það framkvæmanlegt.

Ætlunin er að stofna rekstrarfélag um vinnslu á frosnum og ferskum afurðum á Flateyri sem nýta mun fullkominn tækjakost og einvalalið starfsmanna sem hefur mikla reynslu af fiskvinnslu eins og segir í tilkynningunni. Segist fyrirtækið vilja gera allt sem það geti til að sem flestir starfsmenn Kambs haldi vinnu sinni.

„Þekking og reynsla starfsmanna er lykillinn að hagkvæmri vinnslu og því vilja eigendur Oddatáar ehf. stuðla að því að heilindum að starfsmönnum Kambs verði gert kleift að taka þátt í uppbyggingu fyrirtækisins og taki jafnframt að sér stjórnun vinnslunnar að stórum hluta,“ segir í tilkynningunni.

„Eigendur Oddatáar ehf. gera sér grein fyrir því að verið er að ráðast í umfangsmikið verkefni og óska þess vegna eftir góðu samstarfi við íbúa svæðisins og öllum þeim sem lagt geta sín lóð á vogarskálarnar á þessum umrótartímum," segir að endingu í tilkynningunni.