Í hvoru liðinu ertu, Becks?

David Beckham hefur valdið miklu fjaðrafoki með nýjustu Armani auglýsingunni sinni. Hún hefur enn á ný vakið upp spurningar um kynhneigð knattspyrnumannsins og þykir nokkuð djörf.

Breska blaðið Sun lét ekki sitt eftir liggja og fékk samkynhneigða sjónvarpsstjörnu til að gera úttekt á auglýsingunni.

Þar liggur Beckham fáklæddur á rúmi með fætur glenntar í sundur og þykir sumum auglýsingin "sýna full mikið." Greinarhöfundur Sun veltir því m.a. fyrir sér hvort einhver annar karlmaður á jörðinni en Beckham myndi klæðast nærbuxum á borð við þær sem hann klæðist í auglýsingunni.

Sérfræðingur Sun segir að þó knattspyrnumaðurinn og kyntáknið feti þarna enn og aftur inn á kvenlegar brautir, sé þetta nýjasta útspil hans aðeins frekari staðfesting á því hvað hann sé öruggur með útlit sitt og kynhneigð.

Samkynhneigðir karlmenn geti því í besta falli vonast til að hafa Beckham með sér í svefnherberginu í formi veggspjalds fyrir ofan rúmið. Það sé á hreinu að EF Beckham væri inni í skápnum - myndi hann aldrei þora að láta taka slíkar myndir af sér.