Von á yfirlýsingu frá bæjarstjórn Akureyrar

Töluverð umræða hefur skapast í kjölfar undirskriftasöfnunar sem Birgir Torfason veitingamaður á Akureyri stendur fyrir vegna þess að ungmennum var bannað að tjalda í bænum um síðustu helgi. Bæjarfulltrúi segir í samtali við Vísi að yfirlýsingar vegna málsins sé að vænta í kvöld eða í fyrramálið.

Birgir krefst þess að Bæjarstjóri Akureyrar ásamt meirihluta bæjarstjórnar segi af sér. Hann segir verslunarmenn í bænum hafa orðið fyrir tapi um verslunarmannahelgina sem nemur milljónatugum vegna þeirrar ákvörðunar að meina ungmennum á aldrinum 18 - 23 ára að tjalda í bænum um síðustu helgi. Þessi ákvörðun sýnir, að mati Birgis, að bæjarstjórnin og bæjarstjórinn séu með öllu vanhæf til þess að sinna skyldum sínum í þágu bæjarbúa.

Ekki hefur náðst í bæjarstjórann, Sigrúnu Björk Jakobsdóttur, né forseta bæjarráðs, Hermann Jón Tómasson, vegna málsins í dag. Hjalti Jón Sveinsson, skólameistari Verkmenntaskólans á Akureyri sem situr í bæjarstjórn fyrir Sjálfstæðisflokkinn sagði í samtali við Vísi að von væri á yfirlýsingu frá bæjarstjórninni vegna málsins í kvöld eða í fyrramálið. Hann vildi því ekki tjá sig um málið að svo stöddu.