Skorað á bæjarstjórnina að segja af sér

Birgir Torfason, sem rekur veitingastaðinu Kaffi Akureyri og Vélsmiðjuna, hefur opnað vefsíðu á slóðinni www.akureyri.blog.is þar sem safnað er undirskriftum þeirra sem vilja skora á meirihluta bæjarstjórnar á Akureyri til að segja af sér tafarlaust.

Birgir segist ekki vita hvaða viðbrögð undirskriftasöfnunin muni fá, en hann vilji gjarnan vekja athygli á þeirri óánægju sem sé með þá ákvörðun bæjaryfirvalda að hafa lokað tjaldsvæðum fyrir ungmennum á aldrinum 18-23 ára um helgina. Birgir segir að ákvörðunin skjóti skökku við í ljósi þess að verið sé að bjóða ungt fólk velkomið til bæjarins í nám í haust.

Birgir segir að töluvert minna hafi verið að gera á Kaffi Akureyri og Vélsmiðjunni um verslunarmannahelgina miðað við það sem var í fyrra og því telji hann sig hafa orðið fyrir tjóni. Hann segir að það sama gildi um aðra verslunarmenn og veitingahúsaeigendur á Akureyri.