Telja að mastur auki líkur á krabbameini

„Samkvæmt erlendum rannsóknum hefur komið í ljós að umtalsverð aukning er á nýgengi krabbameins hjá íbúum sem búa í nálægð við farsímamöstur,“ segir í athugasemd íbúasamtaka þriðja hverfis, Hlíðar, Holta og Norðurmýri, við fyrirhugað fjarskiptamastur á lóð Kennaraháskóla Íslands og Fjöltækniskólans að Háteigsvegi 43 í Reykjavík.

Samtökin benda á að fyrirhuguð staðsetning þessa átján metra háa masturs sé í um 130 metra fjarlægð frá leikskólanum Klömbrum og í um 180 metra fjarlægð frá Háteigsskóla. Til viðbótar eru Fjöltækniskólinn og Kennaraháskólinn skammt frá.

„Ég er sammála samtökunum í þessu máli. Maður vill ekki vera á móti tækninni sem slíkri en á meðan það eru ekki til rannsóknir sem sýna að þetta sé meinlaust þá finnst mér að börnin eigi að njóta vafans,“ segir Ásgeir Beinteinsson, skólastjóri í Háteigsskóla.

„Börnin eru í skólanum frá hálf níu á morgnana til þrjú á daginn og þá allan tímann undir áhrifum þessa masturs séu þau til staðar,“ segir hann.

Í athugasemdinni, sem íbúasamtökin sendu skipulags- og byggingasviði, er vísað til tveggja rannsókna, frá Ísrael og Þýskalandi, þar sem niðurstöðurnar voru að fólk sem byggi í innan við 400 metra fjarlægð frá farsímamöstrum væri þrisvar til fjórum sinnum líklegra til að fá krabbamein en það sem býr lengra frá möstrunum.

„Börn í hverfinu og borginni allri eiga ekki að vera tilraunadýr og ekki er hægt að leyfa sér að taka áhættu þegar kemur að þeirra heilbrigði,“ segir í erindi íbúasamtakanna.

„Ég veit ekki um neinar nýlegar kannanir sem hafa verið að vekja ugg,“ segir Þorgeir Sigurðsson, rafmagnsverkfræðingur hjá Geislavörnum ríkisins sem hafa eftirlitshlutverk með farsímageislun á almenning.

„Við förum eftir alþjóðlegum viðmiðunarmörkum um rafsegulsvið. Nokkrum metrum frá sendi mælist segulsviðið venjulega innan viðmiðunarmarka. Segulsvið frá GSM-síma sem menn eru með við eyrað er margfalt sterkara en frá sendunum, en þó innan viðmiðunarmarka,“ segir hann.

Frestur til athugasemda rann út í gær. Samkvæmt upplýsingum hjá skipulags- og byggingasviði verða athugasemdir við deiliskipulagið teknar til athugunar á næstu dögum.