Sýslumaður og sendiráð mest framúr fjárlögum

Samkvæmt skýrslu Ríkisendurskoðunnar um framkvæmd fjárlaga á síðasta ári eru það sýslumannsembættið á Keflavíkurflugvelli og sendiráð Íslands sem fara hvað mest framúr fjárlögum síðasta árs. Sýslumannsembættið með 59 milljón kr. halla og sendiráðin með 52 milljón kr. halla. Uppsafnaður halli sýslumannsembættisins nemur nú um 148 milljónum kr. og sendiráðanna um 129 milljónir kr.

Hvað sýslumannsembættið varðar segir Ríkisendurskoðun m.a. að ástæður frammúrkeyrslunnar séu auknar kröfur, aukin verkefni og þær breytingar sem urðu við brottför varnarliðsins en hið síðasttalda er talið hafa kostað embættið um 77 milljónir kr.

Hvað sendiráð Íslands varðar nefnir Ríkisendurskoðun að hluti vandans stafi af húsnæðisframkvæmdum víða um heim. Um þetta segir m.a. í skýrslunni: "Í þeim tilvikum hefði átt að stöðva framkvæmdir þar til fjárheimild væri fengin."

Hvað varðar undirrótin að því að ríkisstofnanir fari fram úr fjárlögum og í hallarekstur segir m.a. í skýrslu Ríkisendurskoðunnar að um visst mynstur sé að ræða. Forstöðumaður telur þörf á auknum útgjöldum og óskar eftir viðbótarheimild en fær ekki. Hann tilkynnir þá ráðuneyti sínu að hann ætli að skera niður til að starfsemin rúmist innan fjárheimilda. Ráðuneytið biður hann um að gera slíkt ekki, ætlun sé að finna aðrar lausnir á fjárhagsvandanum. Þær lausnir láta á sér standa. Þannig geti vandinn vaxið ár frá ári.

Síðan segir í skýrslu Ríkisendurskoðunnar: "Hvort sem slíkar fullyrðingar forstöðumanna um afskipti ráðuneyta eru sannar eða ekki er ábyrgð þeirra á fjárhagsvanda stofnanna sinna skýr. Þeir eiga að sjá til þess að þær séu reknar innan ramma fjárheimilda ellegar sæta áminningu eða brottrekstri ef um endurtekin eða stórfelld umframútgjöld er að ræða."