Þingmenn Samfylkingar funda með Ingibjörgu Sólrúnu

Steinunn Valdís vildi ekkert um það segja hvort stjórnarsáttmáli lægi fyrir. Hún hefði komið á fund með formanninum til þess að fara yfir stöðuna. „Þetta skýrist allt saman fljótlega," sagði Steinunn Valdís.

Aðspurð hvort hún ætti von á því að verða ráðherra í nýrri ríkisstjórn sagði Steinunn Valdís að hún vildi ekkert tjá sig um það. Ítrekaði hún að þetta kæmi allt í ljós.

Steinunn Valdís sagðist aðspurð hafa trú á því að þetta yrði góð ríkisstjórn og hún sagðist ánægð með þau heilindi sem verið hefðu í samskiptum Geirs H. Haarde og Ingibjargar Sólrúnar Gísladóttur í viðræðunum.

Ingibjörg Sólrún hefur hefur frá því klukkan 9 í morgun rætt við einstaka þingmenn Samfylkingarinnar og kynnt fyrir þeim innihald fyrirliggjandi stjórnarsáttmála Samfylkingar og Sjálfstæðisflokks.

Hún ræðir við hvern og einn í um 20 mínútur en þar greinir hún ekki frá því hverjir verði ráðherrar flokksins. Það verður kynnt á þingflokksfundi Samfylkingarinnar klukkan 19 í kvöld á Hótel Sögu en að loknum honum er flokksstjórnarfundur þar sem flokksstjórninni verður kynntur stjórnarsáttmálinn.