429 sektaðir fyrir hraðakstur á Bústaðavegi

429 ökumenn voru staðnir að því að aka of hratt á Bústaðavegi um helgina. Brotin náðust á myndavél lögreglunnar og var meðalhraði hinna brotlegu ökumanna 77 kílómetrar á klukkustund. Þeir eiga allir sekt yfir höfði sér. Hámarkshraði á götunni er 60 kílómetrar á klukkustund.

125 ökumenn voru mældir á yfir 80 og 25 á yfir 90, samkvæmt upplýsingum lögreglu, en sá sem hraðast ók var á 107 km hraða. Umrædd myndavél er staðsett á gatnamótum Bústaðavegar og Flugvallarvegar. Fylgst var með ökutækjum sem var ekið Bústaðaveg í vestur en þar er 60 km hámarkshraði.

Í tilkynningu frá lögreglunni er sagt að sérstök ástæða sé til að hvetja ökumenn til að sýna varkárni þegar farið er um Bústaðaveg en þar fjölgaði umferðaróhöppum um rúmlega helming fyrstu fjóra mánuði ársins miðað við sama tíma í fyrra.

„Ljóst er að hraðakstri er um að kenna í mörgum tilvikum," segir lögreglan í tilkynningu sinni og bendir á um helgina varð enn eitt óhappið á Bústaðavegi þegar tveir bílar skullu saman en við það valt annar þeirra. Tildrög slyssins eru enn til rannsóknar en meiðsli ökumanna og farþega voru ekki talin alvarleg.