Íhuga málsókn en hafa engu hótað

Íbúar við Njálsgötu hafa ekki hótað borginni málsókn vegna áforma um stofnun heimilis fyrir útigangsmenn í götunni að sögn annars tveggja fulltrúa íbúa. Hann segir nú beðið eftir áliti lögmanna Reykjavíkurborgar á minnisblaði sem lögmannsstofan Lex gerði fyrir íbúana.

Fram kom í frétt Vísis fyrr í dag að íbúar hefðu í hyggju að höfða málsókn á hendur borginni næðist ekki sátt í málinu. Kristinn Jóhannesson, annar tveggja fulltrúa íbúa við Njálsgötu leggur áherslu á að engu hafi verið hótað og ekkert sé ákveðið í þeim efnum.

„Við munum íhuga málsókn náist ekki sátt í málinu," sagði Kristinn Jóhannesson í samtali við Vísi. „Það hefur hins vegar engu verið hótað."

Fulltrúar Velferðarsviðs og íbúa við Njálsgötu funduðu í síðustu viku vegna málsins. Á fundinum lögðu fulltrúar íbúa fram minnisblað frá lögmannsstofunni Lex þar sem meðal annars kemur fram að verulegar líkur séu á því að fyrirhuguð starfsemi heimilisins sé ekki í samræmi við samþykkt skipulag. Þá telja lögmenn íbúa einnig mögulegt að breytt notkun á fasteigninni kalli á byggingarleyfi með tilheyrandi grenndarkynningu.

Hlé hefur verið gert á viðræðum þangað til fyrir liggur álitsgerð lögfræðinga borgarinnar á minnisblaðinu. Stefnt er að öðrum fundi seint í næstu viku eða í vikunni þar á eftir.