Cruise og Travolta áhyggjufullir vegna eldanna

Kvikmyndaleikararnir Tom Cruise og John Travolta hafa lýst sálarangist sinni vegna skógareldanna í Kaliforníu sem hafa orðið til þess að milljón manns hafa flúið heimili sín. Að minnsta kosti einn hefur látið lífið í eldunum sem geisa um svæði í kringum Los Angeles þar sem fjöldi dægurstjarna býr.

Cruise var við frumsýningu myndarinnar Lions for Lambs í London og sagði eldana afar óheppilega. Hann vonaðist til að öllum gengi vel á svæðinu.

Travolta bætti við að hann vissi að sitt fólk væri öruggt og fyrir það væri hann glaður. Travolta sem er þekktur fyrir áhuga sinn á flugi sagðist hafa flogið yfir svæðið í gær og áhrifin hafi verið afar dramatísk.

Að minnsta kosti 655 heimili hafa eyðilagst í eldunum sem koma í kjölfar mikillar sumarhitabylgju. Eldarnir ná frá landamærum Mexíkó í San Díegó. Lýst hefur verið yfir neyðarástandi í sjö sýslum þar sem 81 þúsund hektari lands hefur brunnið. Þúsundum heimila er ógnað af eldinum. Spáð er hlýrra veðri og miklum vind á svæðinu í dag. Svæðið við ströndina er afar vinsælt af fræga fólkinu. Þar eiga heimili meðal annars Mel Gibson, Barbara Streisand, Richard Gere, Pierce Brosnan, Dick Van Dyke og Ted Danson. Auk fjölda annarra eins og Sting og Olivia Newton-John. Britney Spears sagði í viðtali að hún væri afar hrædd, eldarnir hefðu þó ekki komið að húsi hennar. Um 1500 þjóðvarðsliðar hafa verið fluttir á svæðið til að hjálpa slökkviliðsmönnum. Arnold Schwarzenegger ríkisstjóri í Kaliforníu sagði að þetta væri átakanlegur tími fyrir Kaliforníu.