Vann myndasögukeppni í Danmörku

Jón Kristján Kristinsson er einn þriggja sigurvegara í myndasögukeppni ríkisútvarpsins í Danmörku, eða Danmarks Radio. „Fólk gat kosið uppáhaldsmyndasöguna sína á heimasíðunni. Þeir sem lentu í topp tíu fór svo fyrir dómnefnd," útskýrir Jón.

Blaðamanni telst til að tæplega fimm hundruð myndasögur hafi borist í keppnina. Sjálfur sendi Jón inn fjórar myndasögur, sem allar fjalla um ævintýri búsáhalda.

„Mér datt þetta í hug fyrir svona tveimur árum síðan - að það væri gaman að gefa þeim líf og sjá hvað gerðist," sagði Jón, sem á þeim tíma hefur gert um þrjátíu myndasögur með búsáhöld í aðalhlutverkum. Vinningssagan fjallar til dæmis um brauðrist sem bregður sér í sund, með ónotalegum afleiðingum fyrir aðra sundlaugargesti.

Dómnefndina skipuðu nokkrir fremstu myndasöguteiknarar Dana, á borð við Anders Morgenthaler sem teiknar myndasöguna Wulffmorgenthaler ásamt Mikael Wulff. „Verðlaunin eru að maður fær fjórar myndasögur birtar á dr.dk. Ég held að þær verði á forsíðunni, en ég er ekki alveg viss ennþá. Og svo fær maður fimm þúsund kall, danskan," sagði Jón.

Jón, sem er á tuttugasta og öðru aldursári, hefur verið búsettur í Danmörku síðastliðið eitt og hálft ár með danskri kærustu sinni.

Þegar Fréttablaðið náði tali af honum í gær var hann við vinnu á teiknimyndastofu. „Þetta er verkefnavinna, og ég er svona aðstoðarmaður. Ég vinn sem sagt við að gera teiknimyndir," sagði Jón. Hann segist stefna að því að hasla sér völl í myndasögugeiranum. „En svo er ég líka að spá í að fara í háskóla og læra eitthvað aðeins meira leiðinlegt, eitthvað sem myndi gagnast mér í peningamálum." Myndasögurnar úr keppninni má skoða á heimasíðu danska ríkisútvarpsins, Dr.dk. Fleiri hugarfóstur Jóns Kristjáns má hins vegar berja augum á heimasíðu hans, Jonkk.dk.