Aron Pálmi heim í ágúst

„Já, hann er búinn að bóka ferð heim þessi gleymdi sonur Íslands," segir Einar S. Einarsson talsmaður RFS-hópsins sem barist hefur fyrir frelsun og heimkomu Arons Pálma Ágústssonar.

Að sögn Einars lýkur Aron Pálmi afplánun 17. ágúst, á skráðan miða heim 25. ágúst næstkomandi og lendir að morgni þess 26. á Keflavíkurflugvelli.

Mál Arons Pálma hafa verið fréttamatur allt frá því að Kristinn Hrafnsson þá fréttastjóri á DV greindi frá aðstæðum hans og refsivist í Texas snemma árs 2004.

Aron Pálmi, sem fæddur er árið 1983, var dæmdur árið 1997 í tíu ára refsivist fyrir að hafa barn að aldri sýnt af sér refsiverða kynferðislega tilburði. RJF hópurinn, sem telur skákjöfra á borð við Einar, Guðmund G. Þórarinsson, Garðar Sverrisson, Helga Ólafsson og fleiri, tók málið upp á sína arma. En áður hafði hópurinn lagt sitt af mörkum svo Bobby Fischer gæti komið til landsins og fengið íslenskan ríkisborgararétt úr fangelsi í Japan. Til þess vísar nafn hópsins - upphafsstafa Roberts James Fischers.

„Aron Pálmi er nú búinn að afplána 10 ár í refsivist. Þar af fjögur ár í stofufangelsi. Hann hefur notið þess síðasta eina og hálfa árið að geta stundað nám við Lamor háskóla í Texas. Þar eru átta þúsund nemendur," segir Einar og kveður skólavist Arons Pálma hafi gengið að óskum. Hann hefur meðal annars verið valinn í stúdentaráð og kjörinn ritstjóri árbókar skólans.

Einar segir það öllu máli skipta að Aron hafi um eitthvað að hugsa í þeirri viðkvæmu stöðu sem Aron er. Til dæmis hafi menn veist að honum og Aron Pálmi ekki þorað að svara fyrir sig af ótta við að borið sé á hann að Aron hafi átt upptökin. Það þýði að hann þarf að endurtaka refsivist sína. Aron Pálmi er af þeim sökum taugaóstyrkur og framganga hans varleg til samræmis við erfiða stöðu hans.

„Hann má ekki lenda í neinu núna þessa síðustu mánuði," segir Einar sem heyrir reglulega frá Aroni Pálma. Að sögn Einars hefur hann einsett sér að léttast um 100 pund í það minnsta fyrir heimkomuna. „Hann er vel í hold kominn. Enda hefur hann örugglega lifað á einhverju ruslfæði og hormónakjöti," segir Einar.

RJF hefur stutt Aron Pálma dyggilega að sögn Einars og greitt fyrir skólagöngu hans nú vel á aðra milljón. „Þetta er eitthvað sem við höfum verið að öngla saman og safnað. Nei, við erum ekki enn farnir að undirbúa komu hans," segir Einar. Enda nokkrir mánuðir í að Aron lendi.

Til marks um það hversu sterkur karakter Aron Pálmi er hefur Einar það að hann hefur gengið með GPS-staðsetningartæki á fjórða ár sem mun einsdæmi í heiminum, í það minnsta vestan hafs, en hámarkið hefur verið eitt ár. „Og hann er að rita bók um reynslu sína af refsikerfinu í Texas. Hann hefur sent mér kafla: „Welcome to the system" heitir hann og sláandi."