Þreyttur á uppsagnarbréfum

„Þetta er alveg óþolandi. Ég er búinn að fá nóg af þessum uppsagnarbréfum. Ég get svo svarið það. Þriðja skiptið á einu ári,” segir Andri Freyr Viðarsson útvarpsmaður en hann hefur verið annar umsjónarmaður Capone útvarpsþáttarins á X-Fm sem vakið hefur nokkra athygli á undanförnum árum og mánuðum.

Öllum starfsmönnum á X-Fm og KissFm var sagt upp störfum á gamlársdag. Nú er bara leikin þar músík og engin dagskrárgerð í gangi. Andri segir uppgefna ástæðu fyrir lokun stöðvanna þá að Stef hafi svipt stöðvarnar útvarpsleyfi vegna skuldar.

„En ég kaupi það nú ekki. Þetta er eitthvað plott. Það verður fundur á morgun [í dag] og þá kemur þetta betur í ljós. En, já, við erum með uppsagnarfrest. “Hangin’around” heima hjá mér. Ég kann ofsalega vel við það. Nú er bara að slaka á. Nema eitthvað annað gerist. Nema Valli sport opni aftur stöð! Það er aldrei að vita.”

Yfirmaður útvarpssviðs Íslenska útvarpsfélagsins, sem rekur stöðvarnar tvær, er Kristján Jónsson, betur þekktur sem Kiddi Bigfoot: „Það hefur ekki verið tekin ákvörðun um framtíð útvarpsstöðvanna. Hún verður tekin á næstu dögum.“ Hann segir það rangt að Stef hafi svipt stöðvarnar útvarpsleyfi vegna skuldar. Hið rétta sé að Stef hafi ekki samþykkt nýtt útvarpsleyfi sem svo er lagt fyrir útvarpsréttarnefnd, en hið gamla rann út um áramót.

„Við skuldum eitthvað, það er rétt, en við skuldum Stef ekki neitt,“ segir Kiddi sem fékk það hlutskipti að segja starfsfólki sínu upp. Honum var sjálfum sömuleiðis sagt upp störfum. Aðspurður segir Kiddi að rekstur útvarpsstöðvanna hafi gengið bærilega. Gamlar skuldir hafi fylgt stöðvunum en ágætlega hafi gengið að vinna þær upp. Eiríkur Tómasson, framkvæmdastjóra Stefs, segir að stöðvarnar hafi verið í vanskilum við Stef. Af þeim sökum hafi samningi við þær verið rift. Skuldin hafi síðar verið gerð upp fram til áramóta. Vilji X-FM og KissFM fá endurnýjað útvarpsleyfi þurfi að ganga frá nýjum samningi við Stef, meðal annars með greiðslu trygginga.