Ísland skotspónn rússneskra grínara?

„Rússneskir auðjöfrar hafa fengið Mariu Carey, Justin Timberlake og Whitney Houston til að skemmta sér um borð í flugvélinni Flying Titanic. Um 125 manns munu borða og skemmta sér á glæsilegum veitingastað inni í flugvélinni en förinni mun vera heitið til Íslands þar sem þeirra bíður íshöll.

Hersingin mun síðan fagna nýju ári í leikmynd frá Hringadróttinssögu-kvikmyndunum.“ Svona hljómaði frétt rússneska veftímaritsins Pravda að morgni 30. desember. Miðaverðið í þessa glæsilegu ferð var sagt á bilinu ellefu til sextíu og sex milljónir íslenskra króna en svipað uppátæki vakti mikla athygli í fyrra þegar olíujöfrarnir fengu Tinu Turner til liðs við sig.

Eftir því sem Fréttablaðið kemst næst þá afbókaði Mariah Carey sig enda var hún stödd með Opruh Winfrey í Suður-Afríku þar sem sjónvarpskonan fræga hélt glæsilega veislu á Sun City-hótelinu.

Reyndar er ýmislegt grunsamlegt við frétt Pravda og ekki ólíklegt að hér hafi verið um grín að ræða og verið sé að skjóta föstum skotum á rússnesku auðjöfrana sem virðast geta leyft sér nánast allt í heiminum.

Bandaríska síðan Memphisflyer.com tekur málið upp og segir að varla sé til helvita maður sem myndi nefna flugvélina sína í höfuðið á skipinu fræga sem sökk í jómfrúarferð sinni. Þá myndi stórstirnið Justin Timberlake varla láta bjóða sér það að ferðast með dóphausnum Houston og skapofsakonunni Carey til Íslands til þess eins að skemmta rússneskum „glæpamönnum“.