Sátu fyrir framan loftpúða

Umferðarstofa og Slysavarnafélagið Landsbjörg hafa birt niðurstöður úr árlegri könnun sinni á öryggi barna í bílum.

Niðurstöðurnar sýna að nítján börn sátu fyrir framan öryggispúða, sem þýðir að þau hafi verið í alvarlegri lífshættu á meðan akstri stóð. Ef börn hafa ekki náð 150 sentimetra hæð mega þau ekki undir neinum kringumstæðum sitja fyrir framan virkan öryggispúða þar sem hann skýst fram á um 300 kílómetra hraða við högg og það getur reynst börnum banvænt.

Niðurstöðurnar sýna einnig að mikið hefur áunnist undanfarin ár. Árið 1997 voru 32 prósent barna án nokkurs öryggisbúnaðar í bílum en í ár er talan rúm þrjú prósent. Þennan árangur skýrir Einar Magnús Magnússon, upplýsingafulltrúi Umferðarstofu, með þeim könnunum sem hafa verið gerðar. "Við höfum reynt að láta fólk virkilega finna fyrir niðurstöðum þessara kannana," segir Einar og bendir á að foreldrum sé leiðbeint um hvernig best sé að haga öryggisatriðum þegar könnunin fer fram. Hann bendir einnig á að ýmiss konar áróður sem farið hefur fram og hertar reglur sem hafa verið settar hafi borið árangur.

Könnunin var gerð í apríl og tók til öryggisbúnaðar barna og notkunar hans í bílum foreldra og forráðamanna. Könnunin var gerð við 68 leikskóla um land allt og þátttakendur voru yfir 2.000 í ár.