Sjö menn dæmdir fyrir skattalagabrot

 Þrír dómar vegna vangoldins virðisaukaskatts og brota á lögum um staðgreiðslu opinberra gjalda féllu í Héraðsdómum Reykjavíkur og Suðurlands á miðvikudag og á mánudag. Héraðs­dómur Suðurlands dæmdi mann í sjö mánaða skilorðsbundið fangelsi og til greiðslu á 25 milljónum fyrir stórfellt skattalagabrot í fyrradag.

Er honum gert að hafa vanrækt að telja til skatts tekjur sínar af sjálfstæðri atvinnustarfsemi sinni árin 1999 til 2002 og jafnframt að hafa ekki staðið skil á tekjuskatti árin 1998 til 2001.

Þannig kom hann sér undan 15 milljóna króna greiðslum.

Héraðsdómur Reykjavíkur dæmdi á mánudag þrjá stjórnendur matsölustaðar til að greiða samanlagt 27,5 milljónir í sekt fyrir vangoldinn virðisaukaskatt og brot á lögum um staðgreiðslu opinberra gjalda. Sá sem hæsta dóminn hlaut fékk 22 milljóna sekt og þriggja mánaða fangelsisdóm, skilorðsbundinn til tveggja ára.

Héraðsdómur Reykjavíkur dæmdi einnig þrjá starfsmenn ráðgjafarfyrirtækis í sektir fyrir samskonar brot á mánudag. Þeim var gert að greiða samtals 10,3 milljónir í sektir og hlutu allir eins árs fangelsisdóm, skilorðsbundinn til tveggja ára.

Löggjafinn lítur skattalagabrot alvarlegum augum. Þurfa lögbrjótar að greiða margfalt þá upphæð sem þeir svíkja undan, sannast brot þeirra fyrir dómi.