Fjölmenningarsamfélagið Ísland

Þótt Ísland sé ekki fjölmennt samfélag gerist það æ fjölmenningarlegra. Alþjóðahúsið fagnaði fjölmenningunni með því að halda svokallaða þjóðahátíð í gamla Blómavalshúsinu í dag. Yfir 300 manns af meira en 40 þjóðernum undirbjuggu hátíðina og gestum gafst kostur á að smakka yfir 50 mismunandi þjóðarrétti og spjalla við fólk á næstum fjörutíu tungumálum.

Það var iðandi mannlíf í gamla blómavalshúsinu við Sigtún í Reykjavík í dag. Það var eins og að fara um ókunna veröld í órafjarlægð frá Íslandsströndum. Fólk af öllum regnboganslitum talandi framandi tungum dansandi syngjandi hlæjandi klappandi og stappandi. Hiti og sviti og múgur og margmenni. Markmið þjóðahátíðarinnar sem nú var haldinn af alþjóðhúsinu í þriðja sinn er að kynna það fjölmenningarlega samfélag sem Ísland er orðið og hvaða áhrif fólk af erlendum uppruna hefur á samfélagið, hvernig það auðgar menninguna. Hátíðinni er einnig ætlað að auka skilning á milli fólks af ólíkum uppruna.

Heiðursgestir þjóðahátíðarinnar voru þau Baltasar Samper og Alexandra Kuregej Argunova sem settust hér að fyrir mörgum áratugum þegar Íslendingar ráku upp stór augu er erlend vera varð á vegi þeirra. Þegar Baltasar kom hingað sem ungur maður frá Spáni var honum gert að skipta um nafn. Hann gat þó keypt sér sitt gamla nafn aftur þegar lögunum var breytt skömmu síðar.

Alexandra Kuregej gaf Alþjóðahúsi málverk í tilefni dagsins. Þrjár Maríur heitir verkið og sýnir þrjár konur, hvíta, svarta og gula.

Í borginni búa yfir 5 þúsund erlendir ríkisborgarar af 116 þjóðernum. Þjóðahátíðin endurspeglaði þá staðreynd.