Íslenski draumurinn

Íslendingar taka mun meira mark á draumum en nágrannaþjóðirnar. Þeir tala meira um drauma, ráða í þá og trúa á að draumar geti sagt fyrir um framtíðina í mun meira mæli en aðrar Vestur-Evrópuþjóðir. Þetta er niðurstaða doktorsrannsóknar Adriënne Heijnen sem byggð er á vettvangsrannsóknum í Hrunamannahreppi á árunum 1994-2000.

Adriënne segir að í heimalandi hennar, Hollandi, séu draumar, að flestra áliti, hreinn uppspuni sem enga merkingu hafi. Þeir fáu sem lesi í drauma sjái frekar út úr þeim vísbendingar um sálarlíf og persónuleika dreymandans. Því sé það sérstakt hvernig Íslendingar lesi úr draumum vísbendingar um framtíð dreymandans og jafnvel annarra líka. Draumatúlkanir Íslendinga séu ekki jafnsjálfhverfar og annarra þjóða.

Adriënne segir enga eina ástæðu skýra þennan mun á Íslandi og nágrannalöndunum. Að vissu leyti megi skýra þetta sem þörf fyrir að reyna að ráða í óvissa framtíð þar sem lífið er svo háð náttúruöflunum. Hins vegar sé þetta að miklu leyti líka lærð hegðun sem berist frá kynslóð til kynslóðar og sé þannig viðhaldið í samfélaginu.