Strætó segir rangt að aðildarsveitarfélög hafi ekki greitt framlög

Strætó bs. segir það rangt hjá Degi B. Eggertssyni, borgarfulltrúa Samfylkingarinnar, að aðildarsveitarfélög hafi svikist um að greiða framlög til fyrirtækisins.

Í yfirlýsingum frá Strætó segir að öll aðildarsveitarfélög hafi að fullu staðið við skuldbindingar sínar samkvæmt samþykktri fjárhagsáætlun byggðasamlagsins. Ekkert aðildarsveitarfélag hafi því svikist um að greiða framlög í samræmi við launahækkanir vegna nýgerðra kjarasamninga.

Fjárhagsáætlun Strætó bs fyrir árið 2006 hafi hinsvegar verið afgreidd með bókun þess efnis, að ekki hefði verið tekið tillit til þeirra kostnaðarhækkana sem yrðu í kjölfar kjarasamninga sem voru í burðarliðnum þegar fjárhagsáætlunin var samþykkt.

Hið rétta er því að Strætó bs hefur ekki verið bættur upp sá kostnaðarauki sem féll til vegna nýrra kjarasamninga í upphafi ársins.