Evel Knievel kærir Kanye

Mótorhjólakappinn fífldjarfi Evel Knievel hefur lagt fram kæru gegn rapparanum Kanye West. Hinn 68 ára gamli Knievel, sem varð frægur fyrir fjölmörg áhættusöm heimsmet og tugi beinbrota samhliða þeim, segir að rapparinn hafi hermt eftir sér í tónlistarmyndbandi við lagið Touch the Sky. Í myndbandinu leikur hann mótorhjólakappa sem kallar sig „Evel Kanyevel“.

„Þetta myndband sem Kanye West gaf út er mesta rusl sem ég hef séð á ævinni,“ er haft eftir Knievel. „Hann er að nýta sér mína ímynd til að verða frægur.“

Kanye West hefur hlotið sex Grammy-verðlaun og nýjasta plata hans hefur selst í 3,6 milljónum eintaka í Bandaríkjunum.