Vinna að Ameríkudraumnum

Hljómsveitina Búdrýgindi ættu allir að kannast við, en þeir unnu Músíktilraunir árið 2002, einungis 15 ára gamlir. Í dag standa strákarnir á tímamótum því þeir útskrifast allir úr menntaskóla núna um jólin. Á döfinni er að taka upp ný lög og svo er á teikniborðinu að reyna „meika það“ í Ameríku undir nýju nafni.

„Ég er á góðri leið með að verða helköttaður,“ segir Magnús Ágústsson, söngvari hljómsveitarinnar Búdrýgindi, en hann var nýkominn úr tækjasalnum þegar blaðamaður náði sambandi við hann. Búdrýgindi sigruðu Músík-tilraunir Tónabæjar árið 2002 og gaf hljómsveitin út í því framhaldi diskinn Kúbakóla en þá voru drengirnir aðeins 15 ára gamlir. Tveimur árum seinna kom svo skífan Juxtapose og nú síðast í sumar tilkynntu þeir áætlanir um að reyna fyrir sér í Bandaríkjunum, undir nafninu Showdown Clown.

„Tónlistin hefur fengið að sitja á hakanum í haust, en við erum allir svo uppteknir við að klára skólann,“ segir Magnús en allir fjórir meðlimir Búdrýginda útskrifast úr Menntaskólanum við Hamrahlíð núna um jólin, sem er kannski ekki merkilegt nema fyrir þær sakir að allir útskrifast hálfu ári áður en eðlilegt þykir.

Magnús neitar því ekki að meðlimir hljómsveitarinnar séu miklir námsmenn en hann og Axel Haraldsson, trommuleikari sveitarinnar, eru báðir með einkaflugmannspróf í ofanálag. „Svo í febrúar ætlum við að fara í einkaflugmannsnám. Við ætlum samt ennþá að verða rokkstjörnur þegar við verðum stórir, bara flug-stjörnur eins og John Travolta og Bruce Dickinson.“ Stefnan hefur verið tekin á upptökuver um hátíðirnar til þess að taka upp nýtt efni og segir Magnús að jafnvel ætli þeir um leið að taka upp enska útgáfu af sínum gömlu lögum.

„Við erum að vinna í þessum Ameríkudraumi og aðstoð væri vel þegin, okkur vantar til dæmis umboðsmann og enn fleiri tengiliði,“ segir Magnús og bætir því við að hljómsveitin vilji ólm hita upp fyrir Incubus sem spilar í Reykjavík eftir áramót. „Svo í janúar verður hljómsveitin níu ára og á næsta ári verðum við akkúrat búnir að vera í bandinu helming ævi okkar,“ en strákarnir hófu að spila saman þegar þeir voru aðeins tíu ára gamlir.