Engar loðnuveiðar í sumar

Ekkert verður af loðnuveiðum í sumar þar sem Hafrannsóknastofnun finnur enga loðnu og gefur því ekki út neinn kvóta. Undanfarin misseri eru því þau lélegustu frá upphafi loðnuveiða.

Þetta er mikill tekjumissir fyrir sjómenn og útvegsmenn þar sem verð fyrir loðnuafurðir er með því hæsta sem það hefur orðið á heimsmarkaði til þessa. Engin loðnuveiði var heldur í fyrrasumar og veiðin á vetrarvertíðinni, sem byrjaði rétt fyrir áramót og stóð fram í mars, var aðeins um 200 þúsund tonn, eða 200 þúsund tonn á 12 mánaða tímabili, sem ekki hefur gerst áður.

Hafrannsóknaskipið Bjarni Sæmundsson hefur að undanförnu verið að leita norðvestur af landinu og komist talsvet vítt um, þrátt fyrir hafís, en ekkert umtalsvert fundið. Það er nú farið á fjarlægar norðurslóðir, ef þar kynni að vera að finna einhverjar skýringar á þessu. All góður kolmunna afli hefur komið loðnuskipunum til góða, en það eru þó ekki nema öflugust skipin, sem geta stundað þær veiðar, hin eru meira og minna verkefnalaus.