Reykjanesbær frestar framkvæmdum

Reykjanesbær hefur brugðist við tilmælum ríkisstjórnarinnar um aðhald í framkvæmdum með því að ákveða að fresta framkvæmdum fyrir röskar sex hundruð milljónir króna í átta mánuði.

Hingað til hafa viðbrögð við frestun verkefna verið nokkuð á hinn veginn, engin vill láta fresta hjá sér, og er Reykjanesbær fyrsta sveitarfélagið til að verða við tilmælum ríkisstjórnarinnar, eftir því sem fréttastofa NFS kemst næst

Árni Sigfússon, bæjarstjóri Reykjanesbæjar, segir eðlilegt að taka á þessum málum og telur að sveitarfélögin í kring hljóti að vera að undirbúa svipaðar áætlanir. Þegar spurður hvort þetta vekji ekki upp óvinsældir hjá íbúum bæjarins, segir Árni að þetta komi sér náttúrulega illa fyrir marga. Hann trúir því þó að þegar menn fari að setja hlutina saman þá átti þeir sig á því að þetta tímabundna aðhald í framkvæmdum á svæðinu muni skila bæjarfélaginu mun sterkara til framtíðar.