Þjónar best hagsmunum fyrirtækisins að gefa ekki upp orkuverð

Stjórn Landsvirkjunar ákvað á fundi sínum í dag að raforkuverð til Alcoa verði ekki gert opinbert. Stjórnin telur það þjóna best hagsmunum fyrirtækisins að orkuverð fáist ekki gefið upp. Helgi Hjörvar ætlar að taka málið upp á Alþingi.

Þau Helgi Hjörvar og Álfrún Ingadóttir, sem sitja í stjórn Landsvirkjunar, lögðu fram tillögu í dag á stjórnarfundi þess efnis að trúnaðarskyldu á raforkuverði til Alcoa verði aflétt. Ástæðan voru ummæli forstjóra Alcoa sem sagði fyrirtækið hafa greitt helmingi hærra verð fyrir raforku til álvers í Brasilíu en hér á landi. Hann hefur síðan sagt að hann hafi farið með rangt mál. Stjórn Landsvirkjunar felldi tillöguna á fundi sínum í dag og raforkuverð sem Alcoa greiðir til Landsvirkjunar verður því ekki gert opinbert.

Friðrik Sophusson, forstjóri Landsvirkjunar, segir afstöðu stjórnar þá að fyrirtækið nái betri samingum ef trúnaðarskyldan er fyrir hendi. Aðspurður um hvort til greina komi að aflétta leyndinni á einhverjum tímapunkti segir hann allt koma til greina en ákvörðun um að aflétta trúnaðarskyldunni verði að taka í stjórn. Nú gildi reglur í stjórninni sem gilt hafa frá árinu 1995. Ef stjórnin telji á einhverjum tímapunkti það koma fyrirtækinu betur að gefa upp verð þá verði það gert en nú telji meirihluti stjórnar þá stöðu ekki fyrir hendi.

Þrátt fyrir trúnaðarskylduna gat Friðrik sagt að það verð sem Alcoa myndi greiða í dag ef verið væri að selja þeim samkvæmt samningnum vera um þrjátíu dollarar á megawattið eða tæpar tvö þúsund og þrjúhundruð íslenskar krónur.

Helgi Hjörvar segir Alcoa í raun hafa aflétt trúnaði með yfirlýsingum sínum. Helgi segir best að birta verðið svo að allir geti komsti að efnislegri niðurstöðu og viti hvað sé rétt í málinu. Helgi hyggst leggja til að málið verði rætt í sölum Alþingis.