Skógarhöggsmaður Íslands varði titilinn

Skógarhöggsmaður Íslands varði titil sinn á Íslandsmeistaramótinu í skógarhöggi sem haldið var í Hallormsstaðaskógi í blíðskaparveðri í dag. Lárus Heiðarsson skógræktarráðunautur stóð uppi sem sigurvegari í lok dagsins og heldur því titlinum skógarhöggsmaður Íslands annað árið í röð.

Keppnin fór fram í tveimur hlutum, fyrst úti í skógi þar sem keðjusöginni var beitt til að fella tvö tré og sníða af þeim greinarnar. Þá var haldið niður á hátíðasvæði þar sem fjöldi áhorfenda sat í sólinni og hvatti mennina áfram. Þar á túninu hlupu skógarhöggsmennirnir og gripu axirnar og hjuggu þrjá viðarkubba niður í fjórðunga og hlupu svo til baka þar sem þeir áttu að saga niður þrjár tveggja sentimetra sneiðar. Refsistig voru gefin ef öryggisbúnaði var ábótavant og eins ef nákvæmnin var ekki nægileg.

Lárus Heiðarsson skógræktarráðunautur stóð uppi sem sigurvegari í lok dagsins og heldur því titlinum skógarhöggsmaður Íslands annað árið í röð.

Íslandsmótið í skógarhöggi er hluti af árlegum hátíðahöldum í Hallormsstaðaskógi sem nefnist skógardagurinn mikli. Nokkur hundruð manns sóluðu sig í rjómablíðu í skjólsælum skógarrjóðrum, fylgdust með skemmtiatriðum og gæddu sér á nautinu sem var heilsteikt á teini fyrir skógargesti.