Skaðleg smáskilaboð

Gífurlegur fjöldi SMS smáskilaboða, jafnvel yfir hundrað þúsund, voru send á íslensk GSM símanúmer um tíu-leytið í morgun. Skilaboðin geymdu upplýsingar um erlenda stefnumótasíðu og ef farið er inn á heimasíðuna mun tölva viðkomandi smitast af skaðlegum tölvuvírus.

Fyrr í þessum mánuði fengu sumir notendur Símans svipuð smáskilaboð en í þetta sinn eru viðskiptavinir annarra símafyrirtækja einnig að fá þau. SMS smáskilaboðin sjálf skaða ekki og enginn kostnaður er sjálfkrafa skuldfærður á símreikning notenda eins og sagt er í skilaboðunum.

Sendingar þessar koma að sögn frá útlöndum en slíkur SMS-ruslpóstur er nokkuð algengur. Er fólki bent á að eyða slíkum smáskilaboðum og láta alls ekki glepjast til að fara inn á umrædda vefsíðu.