Jón Ásgeir boðaður til yfirheyrslu vegna meintra skattalagabrota

Jón Ásgeir Jóhannesson, forstjóri Baugs, hefur verið boðaður til yfirheyrslu hjá Ríkislögreglustjóra í næstu viku, vegna meintra skattalagabrota. Þetta kom fram í málflutningi Gests Jónssonar, verjanda Jóns Ásgeirs, í Héraðsdómi Reykjavíkur í dag. En þar fer fram málflutningur í því sem eftir lifir af Baugsmálinu eftir flakk málsins milli Héraðsdóms og Hæstaréttar. Hin meintu brot munu varða skattalög, bókhald og ársreikninga. Gestur sagði að boð Jóns Ásgeirs hefði komið fram eftir að skattrannsóknarstjóri sendi ríkislögreglustjóra niðurstöður vegna skattamála Baugs, Gaums og Fjárfars, sem allt eru félög sem Jón Ásgeir hefur farið fyrir.