Ráðuneytið skiptir sér ekki af málum Tómasar Zoega

Magnús Pétursson, forstjóri Landsspítala Háskólasjúkrahúss, segir starfsmannastefnu Landsspítalans enn þá sömu og áður: að yfirlæknar vinni ekki utan spítalans, nema í undantekningartilvikum eins og ef þeir taka að sér háskólakennslu eða nefndarsetu í öðrum opinberum stofnunum. Þetta sé gert til þess að hindra hagsmunaárekstra sem annars væru mögulegir.

Að mati lögfróðra manna á vegum Landspítalans breytir úrskurður Hæstaréttar engu um starfsmannastefnu spítalans, - enda tekur Hæstiréttur enga afstöðu til hennar, heldur byggist dómurinn á lagatæknilegum atriðum varðandi uppsögnina sjálfa. Landspítalinn mun því áfram fylgja sömu forsendum við ráðningu yfirlækna, undantekningalaust. Þó tekur Magnús fram að tímabundnar tilslakanir hafi verið gerðar, oft á þá lund að nýráðnum yfirlæknum hafi verið gefinn þriggja til sex mánaða frestur til að draga sig út úr öðrum störfum utan spítalans.

Að því er fram kemur í opnu bréfi yfirstjórnar Landspítalans til Tómasar, hefur honum verið boðin yfirlæknis á ný með því skilyrði að hann selji læknisstofu sína og hætti að vinna annars staðar, en þetta eru þau skilyrði sem Tómas vildi ekki sætta sig við í upphafi sem urðu loks til þess að hann var færður úr stöðu yfirlæknis.