Reyna að fjarlægja plötu stærstu fallbyssu El Grillo

Hópur kafara er nýkominn úr leiðangri sem farinn var að flaki skipsins El Grillo á botni Seyðisfjarðar, til að reyna að koma botnplötu stærstu fallbyssu skipsins á þurrt. Svo virðist sem engin olía leki lengur úr skipinu.

El Grillo var olíubirgðaskip bandamanna í seinni heimstyrjöld. Eftir árás þýskra orustuflugvéla á skipið í febrúar 1944 úti fyrir Seyðisfirði tóku Bretar ákvörðun um að sökkva því. Og þar liggur nú skipið á um 40 metra dýpi. El Grillo er engin smásmíði, eða um 11.000 tonn. Til samanburðar er Víkartindur, sem strandaði undan suðurströnd landsins fyrir nokkrum árum, 9.000 tonn. Skipið er 136 metrar að lengd og um 20 metra breitt.

Árni Kópsson kafari, sem margoft hefur kafað að flakinu, segir það alltaf jafn góða tilfinningu. Að koma „svífandi að því" og sjá það birtast smátt og smátt. Hann neitar því þó ekki að skipið er nokkuð „spúkí", eða draugalegt, á að líta þarna á hafsbotninum.

Árni og félagar vinna að því að koma stærstu fallbyssu El Grillo á þurrt. Fyrir tveimur árum fjarlægðu þeir hlaup og fót byssunnar en nú er komið að botnplötunni, sem er engin smásmíði: um meter í þvermál og tíu sentimetrar á þykkt, og telur Árni að þessi stálhlunkur vegi a.m.k. tonn. Platan er fest með tæplega þrjátíu boltum og hafa þeir félagar náð að losa flesta þeirra. Hins vegar vannst ekki tími til að ljúka verkinu að þessu sinni en Árni vonast eftir því að komast í það annað hvort seinna í sumar, eða að ári liðnu.

Umhverfisráðuneytið stóð fyrir hreinsun á olíu úr tönkum skipsins fyrir nokkrum árum. Þó var ekki talið víst að með því hafi verið komið í veg fyrir allan leka úr skipinu. Árni segir þá félaga ekki hafa komið auga á neina olíu, en þar sem skyggnið hafi ekki verið eins og best verði á kosið sé ekki hægt að fullyrða að engin olía leki lengur úr skipinu.