Krefjast dauðarefsingar yfir Saddam

Sækjendur í máli Saddams Husseins hafa farið fram á þyngstu mögulega refsingu: hengingu, ef Saddam verður sekur fundinn um þá stríðsglæpi sem hann er ákærður fyrir.

Sækjendurnir flytja nú lokarök og ræður í máli Saddams Husseins, fyrrum forseta Íraks, og sjö annarra. Verjendur Saddams fá að flytja sín lokaorð um málið þann tíunda júlí, en eftir það munu dómararnir fimm bera saman bækur sínar um sekt sakborninganna.

Þeir eru sakaðir um að hafa myrt 148 sjíamúslima í þorpinu Dujail í kjölfar misheppnaðs tilræðis við Saddam. Verjendur hafa haldið því fram að aðgerðin hafi verið nauðsynleg til varnar forsetanum, auk þess sem tala látinna sé orðum aukin.

Á ýmsu hefur gengið í réttarhöldunum, tveir lögmenn sakborninganna voru drepnir, auk þess sem aðaldómarinn í málinu sagði af sér í janúar.