Hjólamennirnir komnir heim

Fjórum veðurbörnum slökkviliðsmönnum var fagnað innilega við komuna heim til Reykjanesbæjar í dag, eftir að þeir höfðu hjólað hringinn í kringum landið til styrktar Umhyggju, félags foreldra langveikra barna. Mennirnir höfðu þá hreppt öll veður sem boðið er upp á á Íslandi í júní.

Í morgun lögðu þeir upp frá Borgarnesi en sóttist ferðin seint því undir Hafnarfjallinu náðu vindhviðurnar 35 metrum á sekúndu og feyktust mennirnir því eins og lauf í vindi og endasentust ítrekað út fyrir veginn. Út af veðri fengu þeir undanþágu frá lögreglunni og fengu að hjóla í gegnum Hvalfjarðargöngin, en reiðhjólaumferð er að öllu jöfnu stranglega bönnuð þar í gegn.

Ekki tók betra við undir Esjunni, þar voru líka sterkar vindhviður. Mennirnir fengu hressingu hjá kollegum sínum á slökkvistöðinni í Hafnarfirði og þar bættust fjórir í hópinn til að hjóla með þeim síðustu kílómetrana. Þar á meðal var leikarinn Pálmi Gestsson, en sonur hann Gestur Pálmason, er meðal hjólagarpana fjögurra sem lokuðu hringnum í dag.

Enn er hægt að leggja inn á bankareikning söfnunarátaksins og er reikningsnúmerið 1109-05-411115 og kennitalan 610269-3389. Yfir tvær milljónir hafa safnast inn á reikninginn og hafa fyrirtæki og einstaklingar víða um land falið hjólreiðamönnunum fjárframlög á ferð þeirra um landið. Söfnunin stendur fram á laugardaginn 17. júní en þá verður söfnunarféð afhent við hátíðlega athöfn.