Íslensk börn of feit

Eitt af hverjum tíu íslenskum börnum á aldrinum þriggja til sex ára er of feitt. Þróunin versnar eftir því sem börnin verða eldri. Á grunnskólaaldri er allt að fjórðungur barna of þungur. Fleiri þjást af offitu í heiminum en vannæringu.

Könnunin um ofþyngd íslenskra barna var kynnt á námsstefnu um offitu íslenskra barna sem haldin var í dag. Könnunin nær til yfir tuttugu þúsund íslenskra barna frá þriggja og hálfs árs til sextán ára. Tölur um yngri börnin frá þriggja og hálf árs til fimm ára koma úr ung- og smábarnavernd.

Geir Gunnlaugsson, barnalæknir og forstöðumaður Miðstöðvar heilsuverndar barna, segir þróunina hafa farið stig vaxandi frá árinu 1950. Hann segir þjóðina þurfa að vera heilsulæsari þannig að fólk sé meðvitaðri um það sem að lætur ofan í sig og um það hversu miklum tíma sé eytt í tölvunotkun og sjónvarpsgláp því vandamálið sé gríðarlegt. Allir þurfi að stilla strengi sína, stjórnvöld, skólakerfið, heilsugæslan og heimilin. Nauðsynlegt sé að koma heilsueflingu inn í aðalnámskrá skólanna.