Landsflug rifti samningnum vegna vanefnda

Landsflug hefur rift samningi sem gerður var við Flugfélag Vestmannaeyja um kaup á flugvélum Landsflugs og yfirtöku á innanlandsflugi Landsflugs. Þá hefur Landsflug dregið til baka uppsagnir flugmanna og annarra starfsmanna sem sagt var upp störfum eftir að kaupsamningur var undirritaður 24. maí síðastliðinn. Rúnar Árnason framkvæmdastjóri Landsflugs segir vanefndir Flugfélags Vestmannaeyja ástæður riftunar.

Áformað var að Flugfélag Vestmannaeyja tæki við innanlandsflugi Landsflugs 1. júní síðastliðinn en ekki verður af því.

Landsflug var stofnað árið 2003. Þann 1. október 2004 yfirtók félagið rekstur innanlandsdeildar Íslandsflugs hf. og rekur nú 3 flugvélar.

Landsflug stundar áætlunarflug til Vestmannaeyja , Hornafjarðar , Sauðárkróks , Bíldudals og Gjögurs . Auk þess er Landsflug með samning við íslenska ríkið um að sinna sjúkraflugi.

Tilkynning Rúnars Árnasonar framkvæmdastjóra Landsflugs:

"Í kjölfar mjög svo ótímabærrar fréttar af sölu flugvéla Landsflugs ehf til Flugfélags Vestmannaeyja ehf. sem birtist í fjölmiðlum 26. maí sl. og næstu daga þar á eftir, tilkynnist það hér með:

Vegna vanefnda af hendi Flugfélags Vestmannaeyja á kaupsamningi, sem gerður var á milli Landsflugs ehf og Flugfélags Vestmannaeyja ehf. 24. maí sl., hefur Landsflug rift kaupsamningnum sem gerður var á milli félaganna í kjölfar vanefnda kaupanda.

Landsflug ehf. hefur dregið til baka uppsagnir flugmanna og annara sinna starfsmanna, sem sagt var upp störfum í kjölfar þess að kaupsamningur var undirritaður á milli félaganna, þar sem Flugfélag Vestmannaeyja hugðist taka við innanlandsflugi Landsflugs 1. júní sl."