Bruni í Brautarholti

Allt tiltækt lið slökkviliðs höfuðborgarsvæðisins var kallað að gamla Hampiðjuhúsinu við Brautarholt um klukkan sex í morgun eftir að elds varð vart á efstu hæð hússins. Tilkynning um brunann kom klukkan átta mínútur í sex í morgun.

Töluverðan reyk lagði frá húsinu þegar slökkvilið kom á vettvang en það er mannlaust og bíður þess að verða rifið. Reykkafarar voru til öryggis sendir inn þar sem útigangsfólk hefur hafist við í húsinu. Engin reyndist þó vera þar og gekk vel að slökkva. Listamiðstöðin Klink og Bank var þarna til húsa, en upp á síðkastið hefur húsið verið notað sem bílastæði að hluta.

Eldsupptök virðast hafa verið í blaðabunkum á gólfinu, en slökkviliðið var einnig kallað út að húsinu fyrir um mánuði síðan að sögn Óla Ragnars Gunnarssonar varðstjóra.