Ekki færður til vegna umkvartana dómsmálaráðherra

Jóhann Hauksson, blaðamaður Fréttablaðsins, hefur sagt upp starfi sínu eftir að hafa verið færður úr skrifum um stjórnmál. Ritstjóri Fréttablaðsins segir ekkert hæft í þeirri fullyrðingu Jóhanns að hann hafi verið færður til í starfi vegna umkvartana dómsmálaráðherra um skrif hans.

Jóhann Hauksson hefur verið sá blaðamaður Fréttablaðsins sem mest hefur fjallað um þingmál og stjórnmál almennt. Hann segir að í síðustu viku hafi sér verið tilkynnt á fundi með Þorsteini Pálssyni ritstjóra og Sigurjóni M. Egilssyni fréttaritstjóra að hann myndi ekki skrifa frekar um stjórnmál. Ástæðan var sögð sú, að sögn Jóhanns, að hann blandaði eigin skoðunum í fréttaskrif. Jóhann hafi krafið þá um dæmi en engin fengið, en tilteknar hafi verið umkvartanir frá Birni Bjarnasyni dómsmálaráðherra vegna skrifa Jóhanns um hlerunarmálið svokallaða.

Þorsteinn Pálsson var gestur Rósu Bjarkar Brynjólfsdóttur og Lóu Aldísardóttur á Fréttavaktinni á NFS í morgun. Þar sagði hann að ekki minnsti flugufótur væri fyrir þeirri staðhæfingu að tilfærsla Jóhanns í starfi hafi eitthvað með umkvartanir Björns Bjarnasonar dómsmálaráðherra að gera. Fréttaritstjóri Fréttablaðsins hafi rætt við sig um breytingar á þingfréttaskrifunum fljótlega eftir að Þorsteinn hóf störf á blaðinu fyrr á þessu ári. Hann sjálfur hafi hins vegar viljað að Jóhann myndi sinna þeim skrifum a.m.k. út vorþingið. Í millitíðinni hafi fréttaritstjórinn gefið út leiðbeiningar um pistilinn Frá degi til dags sem Jóhann skrifaði gjarnan. Þeirra leiðbeininga hafi Jóhann aftur á móti ekki tekið tillit til í skrifum sínum. Í samtali við fréttastofu NFS í morgun sagðist Jóhann vísa því algerlega á bug að hann hafi ekki farið eftir umræddum leiðbeiningum.

Jóhann hefur nú sagt up störfum á blaðinu og var skömmu fyrir hádegi verið að ganga frá starfslokasamningi hans.