LSH var ekki heimilt að víkja Tómasi Zoega úr starfi yfirlæknis

Ákvörðun Landspítala-Háskólasjúkrahúss að svipta Tómas Zoega yfirlæknisstöðu sinni var ólögmæt. Þetta var úrskurður hæstaréttar í dag.

Tómas var yfirlæknir á geðsviði hjá Landspítalanum frá 1991. Eftir að spítalarnir voru sameinaðir ákvað stjórn spítalans árið 2001 að yfirlæknum yrði ekki leyft að reka eigin stofur samhliða vinnu á LSH. Tómasi var gert að hætta rekstri stofu sinnar og þegar hann gerði það ekki var honum tilkynnt árið 2005 að hann myndi ekki gegna áfram yfirlæknastöðunni.

Hæstiréttur féllst ekki á þá kröfu Tómasar að ákvörðun spítalans yrði ógild þar sem hún hefði verið tekin af lögmætu yfirvaldi. Tómas segir þetta vera undarlegt orðalag og segist ekki sjá hvernig ákvörðunin geti verið annað en ógild þegar hún er dæmt ólögmæt. Dómurinn segi greinilega að stöður yfirlækna séu verndaðar með lögum og ekki sé hægt að eiga við þær með einfaldri stjórnvaldsákvörðun.

Tómas hyggst fara yfir dóminn með lögfræðingi sínum og ræða í kjölfarið við stjórnendur LSH um að endurheimta starf sitt.