Læknanemar mæta til vinnu á morgun

Samningar hafa náðst í kjaradeilu læknanema og yfirstjórnar Landspítalans. Á fundi fulltrúa spítalans og fulltrúa læknanema sem lauk fyrir stundu lagði spítalinn fram tilboð sem fulltrúar nema samþykktu, eftir að hafa borið tilboðið undir samnemendur sína. Læknanemar efndu til mótmælasetu í hádeginu í anddyri Landspítalans við Hringbraut til að vekja athygli á kjaradeilu sinni en þeir hófu ekki störf við spítalann, eins og venja er, þann 1. júní síðastliðinn. Þeir munu hins vegar mæta þar til vinnu í fyrramálið. Að sögn Eyjólfs Þorkelssonar, talsmanns læknanema, verður að öllum líkindum skrifað undir samninginn á næstu dögum.