Tilnefningar til Íslensku leiklistarverðlaunanna kynnt

Forseti Íslands, Ólafur Ragnar Grímsson, og verndari Íslensku leiklistarverðlaunanna kynnti þá sem tilnefndir eru til Grímunnar árið 2006 í Borgarleikhúsinu í dag ásamt leikkonunni Björk Jakobsdóttur.

Þetta er í fjórða sinn sem tilnefningar til verðlaunanna fara fram en þau voru fyrst veitt sumarið 2003. Ólafur Ragnar minntist þess að þegar fyrst var farið af stað með þessar viðurkenningar hefðu einhverjir haft efasemdir um að þær myndu hafa það gildi sem þeim var ætlað. Hann sagði þær efasemdaraddir hafa þó verið með öllu ástæðulausar Gríman hefði fest sig rækilega í sessi í íslensku þjóðfélagi og væri orðin meðal virtari verðlauna sem veitt væru hér á landi.

Hann bætti því svo við að í raun þættu honum tilnefningar til verðlauna mikilvægari þegar upp væri staðið. Það að vera tilnefndur sýndi að viðkomandi væri þess verðugur en oft væri tilviljanakennt til hvers verðlaunin féllu á endanum.

Heimasíða Grímunnar