Óvissa í efnahagsmálum gæti aukist

Óvissa í efnahagsmálum getur aukist vegna afsagnar Halldórs Ásgrímssonar og stöðunnar sem komin er upp í stjórn landsins. Úrvalsvísitalan lækkaði í morgun um 1,8 prósent og gengi bréfa í viðskiptabönkunum sömuleiðis.

Eins og við greindum frá í fréttum hér á NFS í gærkvöld þá hefur matsfyrirtækið Standard og Poor´s breytt mati á efnahagshorfum á Íslandi úr stöðugum í neikvæðar og er of há verðbólga sögð vera stærsta ástæðan fyrir því að matinu var breytt.

Forstöðumaður Hagfræðistofnunnar sagði í samtali við fréttastofu í gær að Ríkisstjórnin þyrfti að beita sig harðar í baráttunni við verðbólguna en gert hafi verið

Nú þegar fyrirhugaðar eru breytingar á ríkisstjórninni í kjölfar afsagnar Halldórs Ásgrímssonar, forsætisráðherra vaknar óneitanlega sú spruning hvaða áhrif það muni hafa á efnahag landsins. Verðbólgan hefur aukist til muna að undanförnu og er nú 7,6 prósent.Gengi krónunnar lækkaði enn í morgun sem og gengi hlutabréfa í Kauphöll Íslands. Úrvalsvísitalan lækkaði og var 1,8 prósent nú rétt fyrir hádegi sem og gengi hlutabréfa viðskiptabankanna. Þannig lækkaði gengi hlutabréfa í KB Banka um 2,75 prósent og Landsbanka um 2,22 prósent.