Sumarblíða í borginni

Veðrið hefur leikið við borgarbúa í dag sem kunna svo sannarlega að njóta góða veðursins. Á meðan sumir dilliðu sér við ljúfan djass, fengu sér aðrir pólskar pylsur eða sýndu breikdans við mikinn fögnuð áhorfenda.

Það vantaði ekki stemminguna á djasstónlikum á Jómfrúnni í dag. Djassinn hefur dunað á hverjum laugardegi yfir sumarmánuðina á Jómfrúnni síðustu ellefu ár. Óhætt er að segja að veðurguðunum hafi ekki tekist að fæla djassistana frá því tónleikar hafa aldrei fallið niður vegna veðurs og hefur þá litlu skipt hvort um rigningu eða rok hafi verið að ræða.

Breikið er komið aftur og það sönnuðu þessi ungu breikarar sem sýndu listir sínar á lækjartorgi í dag. Það kostar blóð svita og tár að verða góður breikari. Þessir strákar sýndu og sönnuðu að þeir að þeir eru góðir enda hrifu þeir unga sem aldna með dansi sínum.

Í pólsku búðinni Strokotka í Hafnarfirði var verið að kynna pólskar pylsur- og matvæli og tilbúinn matur voru á sérstöku kynningarverði. Það var mikil fjöldi viðskiptavina sem lagði leið sína í búðina í dag en flestir Pólverjarnir voru hæstánægðir með að bragða mat frá heimalandi sínu. Þeir voru þó flestir sammála um eitt, það vantaði pólska bjórinn.