Dæmdur til að greiða 200.000 vegna náttúruspjalla

Héraðsdómur Suðurlands dæmdi í gær karlmann til að greiða 200.000 króna sekt fyrir að hafa rutt slóða í þeim tilgangi að gera reiðveg utan vega ofan Hveragerðis, alls tæpa fjóra kílómetra. Maðurinn hafði ekki aflað framkvæmdaleyfis sveitastjórnar líkt og lög kveða á um, né fengið samþykki landeiganda. Stór hluti leiðarinnar er á jaðri Hengilssvæðisins sem er á náttúruminjaskrá og í jaðri Klóamýrar sem er fellur undir vernd náttúruverndarlaga. Maðurinn fékk jarðýtubílstjóra til að ryðja veginn en sá maður var hins vegar sýknaður. Dómaranum í málinu þótti ekki sannað að hann hefði ekki vitað annað en vinnuveitandinn hefði öll tilskilin leyfi.

Í dómnum segir að ljóst sé að veruleg náttúruspjöll hafi verið unnin á svæðinu og það beri þess enn merki tæpum tveimur árum eftir verknaðinn sem átti sér stað í september árið 2004. Manninum var því gert að greiða eins og áður segir 200.000 krónur í ríkissjóð.