Vilhjálmur Þ. og Björn Ingi funda tveir einir

Þeir Vilhjálmur og Björn Ingi hittust í Ráðhúsinu klukkan hálfellefu í morgun og við biðum þeirra þegar þeir stigu út eftir nærri tveggja stunda fund. Vilhjálmur sagði að fundi loknum að málefnavinna gengi vel og menn ynnu hratt og örugglega, ekki væri undan neinu að kvarta. Björn Ingi sagði ekkert óvænt hafa komið upp á en eitt væri ljóst að spennandi tímar væru framundan fyrir borgarbúa.

Það vakti athygli að þeir Vilhjálmur og Björn Ingi kjósa að vera tveir einir þegar þeir ganga frá skiptingu embætta og frá málefnasamningi milli flokkanna. Vilhjálmur segir að þeir tveir þurfi að sjálfsögðu að tala saman sem oddvitar flokkanna og það sé mjög eðlilegt. Hann leggi mikla áherslu á það að vera nánum og góðum samskiptum við Björn Inga. Fundur þeirra tveggja í morgun fór fram í fundarherbergi á þriðju hæð Ráðhússins. Þeir vildu ekkert gefa upp um nánari skiptingu embætta, en áður hefur verið greint frá. Það þykir þó blasa við að sjálfstæðismaðurinn Hanna Birna Kristjánsdóttir verði forseti borgarstjórnar. Sjálfstæðismenn munu að öllum líkindum einnig fá formennsku í skipulags- og byggingarnefnd og formennsku í Orkuveitu Reykjavíkur fyrstu tvö árin en víxla síðan á henni og formennsku yfir Faxaflóahöfnum við framsóknarmenn. Ekki er víst að borgarfulltrúi verði formaður Orkuveitunnar. Þeir Björn Ingi og Vilhjálmur segjast eiga von á því að allt verði þetta orðið klárt upp úr næstu helgi.