Akureyrin EA er væntanleg til hafnar í Hafnarfirði um tíuleytið

Akureyrin EA er væntanleg til hafnar í Hafnarfirði um tíuleytið en tveir menn létust um borð í skipinu þegar kviknaði í því um 75 sjómílur norðvestur af Látrabjargi í gær. Sex sjómenn af skipinu voru fluttir með þyrlu Landhelgisgæslunnar á Landspítala Háskólasjúkrahúss í Fossvogi í gær, en þeir voru allir með snert af reykeytrun. Neyðarkall barst frá Akureyrinni klukkan tíu mínútur yfir tvö í gær þar sem tilkynnt var um eld í káetum sjómanna. Tæpum tveimur tímum síðar barst tilkynning frá skipinu um að tekist hefði að slökkva eldinn en klukkan tuttugu og fimm mínútur yfir fjögur barst önnur tilkynning um að eldurinn hefði tekið sig upp að nýju.

Þyrla Landhelgisgæslunnar flutti slökkviliðsmenn og reykkafara að slysstað og voru þeir látnir síga niður um borð í skipið úr þyrlunni. Ágætisveður var á slysstaðnum. Það var svo um klukkan sex sem tilkynnt var að slökkviliðsmennirnir, ásamt áhöfn skipsins, hefðu náð að slökkva eldinn. Fjórir slökkviliðsmenn urðu eftir í skipinu, ásamt sigmanni þyrlunnar.

Sex menn úr áhöfn skipsins voru hífðir í þyrluna og þeir fluttir á Landspítala Háskólasjúkrahús í Fossvogi þar sem grunur lék á þeir væru með reykeitrun. Þyrlan lenti um klukkan sjö í gærkvöldi og tók séra Pálmi Matthíasson á móti mönnunum.

Akureyrin er nú á hægri siglingu á leið til hafnar í Hafnarfirði þar sem gert er ráð fyrir að skipið komi um klukkan tíu. Togarinn Júlíus Geirmundsson var á slysstað í gær og fylgdi skipinu áleiðis til hafnar en varðskipið Óðinn fer nú með skipinu.

Í gærkvöldi var haldin kyrrðar og bænastund í Glerárkirkju á Akureyri þar sem beðið var fyrir mönnunum sem létust og aðstandendum þeirra. Kristján Þór Júlíusson bæjarstjóri á Akureyri sagði akureyringar harmi slegna.