Eldur logar um borð í Akureyri EA-110

Eldur logar í Akureyrinni EA-110 en skipið er um 75 sjómílur norðvestur af Látrum. TF-LÍF, þyrla Landhelgisgæslunnar er farin af stað með slökkviliðsmenn til aðstoðar skipverjum og björgunarskip Landsbjargar hafa verið sett í viðbragðsstöðu og verður sent af stað ef það þörf krefur og það er talið geta komið að notum.

Stjórnstöð Landhelgisgæslunnar/vaktstöð siglinga barst neyðarkall frá Akureyrinni EA-110 kl. 14:20. Áhöfn björgunarþyrlunnar Lífar var þegar kölluð út. Einnig voru kallaðir út reykkafarar frá Slökkviliði höfuðborgarsvæðisins til að fara með þyrlunni. Um borð í Akureyrinni er 18 manna áhöfn.

Danska varðskipið Triton var einnig beðið um aðstoð og þyrla þess verður send með fleiri slökkviliðsmenn og varðskipið Óðinn lagði strax af stað í átt að skipinu. Þrír togarar voru nærri Akureyrinni þegar eldur kom upp og héldu þegar í átt að skipinu. Það eru togararnir Júlíus Geirmundsson sem var næstur, Guðmundur í Nesi og Örvar. Björgunarbátar á Vestfjörðum og Snæfellsnesi voru settir í viðbragðsstöðu.

Líf fór í loftið kl. 14:57 og er komin að skipinu. Fokker flugvél Landhelgisgæslunnar, Syn, fylgir Líf til öryggis en hún fór í loftið kl. 16. Þyrla varnarliðsins á Keflavíkurflugvelli var kölluð út og bíður hún á Reykjavíkurflugvelli ef flytja þarf fleiri reykkafara.

Akureyrin EA-110 er 900 brúttólesta skuttogari gerður út af Samherja á Akureyri.

Samkvæmt upplýsingum Landhelgisgæslunnar er ekki vitað hvort slys hafa orðið á mönnum.

Á svæðinu er nú norðaustan 8 til 13 metrar á sekúndu og skýjað en með kvöldinu eru horfur á snjó eða slydduéljum en veður fer kólnandi á þessu svæði. Hitinn núna hefur verið á bilinu 2-4 stig en í kvöld kólnar niður undir frostmark.