Villandi upplýsingar um mengun álvers í Helguvík

Frambjóðendur Vinstri hreyfingarinnar -græns framboðs í Reykjanesbæ segja að mengun af völdum álvers í Helguvík verði mun meiri en hingað til hefur verið haldið fram.

Sigurður Eyberg Jóhannesson, oddviti Vinstri hreyfingarinnar - græns framboðs í Reykjanesbæ, segir að mat á umhverfisáhrifum sé villandi. Fjársterkir aðilar beiti brögðum til að koma upp álverinu. Bellibrögðin sjáist í umhverfismati þar sem rætt er um hagstæða vindátt og litla mengun. Sigurður segir að ríkjandi vindátt, norðaustanáttin, sem ríkir á svæðinu um þriðjung ársins, muni blása menguninni beint yfir bæinn. Þynningarsvæði í kringum álverið sé allt of lítið og mengunin, aðallega brennisteinsoxíð, muni því ekki ná að dreifast.

Álver er ekki einu sinni kostur að mati Vinstri grænna, segir Sigurður.