Löggæsla stórefld á Kirkjubæjarklaustri

Löggæsla á Kirkjubæjarklaustri verður stórefld um komandi helgi en tilefnið er árlegt mótorkrossmót sem haldið verður í grennd við Kirkjubæjarklaustur þessa helgi og er eitt fjölmennasta akstursíþróttamót landsins, þetta kemur fram á vef lögreglunnar.

Aldrei hafa fleiri keppendur skráð sig til leiks en þessi keppni verður stærri og umfangsmeiri með hverju ári. Búist er við 1500-2000 gestum í tengslum við keppnina.

Lögreglan á Kirkjubæjarklaustri hefur fengið lögreglumenn frá embætti ríkislögreglustjóra sér til aðstoðar ásamt lögreglumönnum frá Selfossi og verður allt eftirlit hert til muna og sólarhringsgæsla viðhöfð á svæðinu. Auk hefðbundins eftirlits verður sérstök áhersla lögð á eftirlit með utan vega akstri en aðeins hefur borið á því s.l. ár að mótorkrosshjólum hefur verið ekið utan vega á viðkvæmum svæðum og skilið eftir sig sár í náttúrunni sem lengi eru að gróa. Að gefnu tilefni vill lögregla minna ökumenn mótorkrosshjóla á að fara eftir þeim reglum sem um þau gilda og minnir á að allur akstur utan vega á þeim er bannaður nema á þar til gerðum brautum.

Til stemma stigu við utan vega akstri og hafa hendur í hári þeirra sem slíkan akstur stunda hefur lögreglan tekið flugvél á leigu sem notuð verður til að fylgjast með svæðinu úr lofti og auðvelda lögreglumönnum að halda uppi eftirliti. Þeir ökumenn sem staðnir verða að utan vega akstri verða umsvifalaust kærðir.