Hálka víða um land

Hálka og vond færð er víða á þjóðvegum landsins. Á Holtavörðuheiði er hálka og hálkublettir eru á Bröttubrekku. Á Vestfjörðum er Þorskafjarðarheiði ófær, hálka og skafrenningur á Steingrímsfjarðarheiði en snjóþekja eða hálkublettir víðar. Á Norðurlandi vestra má búast við versnandi færð á Þverárfjalli en hálkublettir eru á vatnsskarði. Snjóþekja er á Siglufjarðarvegi og þungfært er í Fljótum. Lágheiði er ófær. Á Öxnadalsheiði er krapi og éljar í kring um Eyjafjörð en í Þingeyjasýslum er sumstaðar talsverð snjókoma og raunar stórhríð á Hólasandi en vetrarfærð er víðast hvar á öllu norðausturhorni landsins. Það er ófært um Hellisheiði eystri og Mjóafjarðarheiði en Vatnsskarð þungfært. Annars eru hálkublettir eða hálka á flestum fjallvegum á Austurlandi.